الثلاثاء، يناير 08، 2008

 

سراق الزيت


ايوا من صغري كنعقل كنت كنحس باليتم ايه غادي تقولوا يتيم و مال دين موك العالم عامر باليتامى او اني كاتب هاد الشي باش تكونوا متضامنين معايا
لا لا المشكيل اني يتيم و والدي عايشين
الواليد كانشوفو مللي كنت صغير غير مرة مرة و غير الناس اللي قالو لي راه هداك السيد لهيه اللي للابس الترييي ديال العسكر هو باك اه هو شي حاجة فلارمي بلا ما ندكرها و عند دين مو دابا شي تسعين عام فات التقاعد لهيه ولكن مازال مخلينون ديكور كايتسارا على حساب الصداع ديال الصحرا
كان عندو شي سبعة ديال العيالات يطلق و يتزوج بحال شي قنية تا الاخير طلق كلشي و عندو اكثر من عشرين ولد و بنت
الناس مللي كنت صغير كانوا يقولو لي راه هاداك خوك او هاديك اختك من باك
مثلا كانتفكر و انا صغير كنمشي فالشارع هاز المحفظة ديالي او الكارتابلي كيما نسميوها فالصحرا غادي للمدرسة و بحا ل ايها الناس كنتلقا صدفة مع مجموعة من العسكر دايرين بالواليد يمسني فراسي و يسول و لد من انت
كانقوليه ولد فلان سميتو هو
كيضحك و قول اه راه عارف راه انا هو هاداك لكن سولتك امك اشنو سميتها كانبقا نشوف فيه و لكن سرعان ما يجاوبوا شي واحد من رجاله هداك راه ولد الشلحة فلانة يعطيني شي فلوس غالبا ما تكون هاديك عشرة الدراهم الحمرا القديمة التي كاتكون فيها مرة هازا عاصا كاتحرك الليمون
هيا و هاديك خمسة الدراهم الزرقاء القديمة ههه
امي ما حاضراش ما كتهضر كاع و غير حابسة راسها ف الدار و انا كبرت غير مع الجيران هما كانو كيبدلو لي حوايجي و يوكلوني و كلشي اما امي غير ساهية و تهضر مع راسها
كنت كان نسمعها تغني وحدها ماشي اغاني ديال الشلحة ولكن اغاني كلاسيكية ديال الحياني و ابراهيم العلمي و بلخياط و الدكالي و حتى المارشال قبو و شقارة دابا كانسمع العلمي بالخصوص ونتفكرها
بعد شي يامات كانعقل بقات كاتخرج من الدار و تسارا فالزناقي و ترجع لدار مع الليل
و ماعرفتش كيفاش تبلات بالكارو و كانت مشكلة ديك الوقت انها اول امراة كاتتكيف فالمدينة الصغيرة فاش عشنا و حتا واحد ماقدر يهضر معاها من ناس لانها كانت مرات فلان الفسيان
الدراري فالمدرسة كانو يعايروني وا ولد الشمكارة و كنت كانبكي
و عرفت من بعد انها تصحبات مع واحد الكونتربونديي و هنا فالصحرا كانت خدمة مزيانة
الوالد جاب لخبار و و صيفط لخوالي انها راه كاتشوهو قالو ليه ياك طلقتيها اش يغيتي مازال
و كانت فضيحة الوالد صيفت كاميو ديال العسكر و ملخو الكونتربوندي مزيان و بقات كيما عاودو ليا من بعد غير امي هي بوحدها كاتدابز مع العسكر و تبكي على حبيبها
و كانو البوليس غير كياتفرجو ماقدرو ايديورو تا حاجا
هادشي تقريبا سنوات 88 او 87

نرجع بالداكرة للور شوية و كنتفكر غير بروتكال او بروتكان ما نعرف كبفاش تسميوه بروتكال كحال ديال العسكر و انا ناعس فالحضن ديال امي وجيب واقفة حدا الباب البروتكال كيكبر و يكبرو يضرب امي و تخلط الكحل بالاحمر و امي كاتغوت شركات ليه الترييي و قمشاتولكن البروتكال كيكبر و يكبر واحد الليلة هاديك اللي عمري ماننسي
ايوا من بعد الواليد قرر يديني عند واحدة اخرى من مرواتو- شي وحدين كايقولو العيالات- لكن كنت ديما كاناكل العصا و التصرفيق و انا ديما ساكت وصوله الاخبار داني عند اخرى نفس الشيء كانو ولادها اي خوتي كايشبعو دين مي عصا هههه وهو يقرر الوالد يصيفطني لمدرسة عسكرية خصوصا و اني كملت الخامسة ابتدائي ديك الساعة صيفطني تما غير لانو كانت حشومة ولد يصيفطو للخيرية
مشيت للكوليج ميليتير فمراكش مخصص اصلا لتكوين لي بيلوت البيزوتاج و التكرفيس حيت كنت اضعف واحد الرقيق فيهم و من بعد للليسي ميليتير فالقنيطرة كانو التلاميد تما غير ولاد العسكر و اقلية ولاد الشعب المزلوط لي كانو كياقراو مزيان ولكن التعليم كان عادي و الاساتدة عاديين غير الادارة اللي كانت عسكرية
من بعد كملت فليسي عادي و من بعد الجامعة و دبا التعليم تدريس الانكليزية ف الليسي ل شي تلاميد وحوش و معايا واحد دين مو خوانجي كانشوفو ديما قبل ما يخرجو التلامد كايدرو صف و يبقاو ابوسو يديه الله ينعل طب... دين مو

نرجع للبروتكال ههه ف اعتصام للمعطلين فاكادير فزنقة مراكش قدام نقابة الاتحاد المغربي للشغل ف 1996 كانو المخازنية كايجيرو علينا و بدات العصا و ضربو اللي ضربو و تفلق اللي تفلق و انا ما كيتان غير الزهيق انا واحد صاحبي و مع تالفين نقزنا فوق واحد السور ديال واحد الفيلا لقينا كاوري فرنسي لابس فوقية و كايتشمش مع راسو شافنا وهو يوقف و بقا كايغوت موماد موماد زعما محمد محمد و هو يخر لينا واحد مولاي الكلب العظمة و صافي و استغربنا واه كيفاش يسمي كلب محمد او موماد كيما قال هو
لكن علاش لا وحنا كانسميو الكلاب ريكس و بوبي و جيمس و ريشارد هههه
كالنا خرجو أو جفي أبلي لا بوليس
ou je vais appeller la police
شرحنا ليه اودي راه البوليس برا كايتكرفس علينا
donc vous etes des mechants?
هههه أودي اسي الكاوري راه هاد البلاد البوليس ماكايتكرفسش علا لي ميشون مي غير علينا حنا الدراوش
خرجنا و لقينا المعطبين صامدين عاطينها للحجر للمخازنية بقينا كانضربو تا احنا بالحجر

بالي بروتكال و المعطبين كايهربو من بعد الهجوم الثاني ديال المرود
انا ما تحركت و ليت مشلول و كانشوف غير فالبروتكال اللي كايكبر
الحاجة اللي مافهم تا واحد و اللي ما فهمت تا أنا هي اني جلست و شديت البروتكال شديت رجل المخزني و بقيت شاد فيها و كلشي كايتعجب هاد النم مالو
اه غادي تقولو هاد زيفا خاصو طبيب نفساني كالو لي من شحال هادي سير شوف طبيب من بعد
مشيت مرة عند واحد عطيت للسكرتيرة اربعة الاف ريال و جلست حداه و بقا كايشوف فكمارتي و يفرنس بحال الى كايشوف شي سراق الزيت و سولني بالزربة واش كاتصلي و اش مصاحب واش كاتفسد
قلت ليه شوف سمح لي كاع و خرجت و اربعة لاف ريال غير ديها شري شي كتب ديال فرويد او بنتو و قرا شوية
و خرجت
هاد المنطيح خاصو هو براسو طبيب نفساني ملي كايسمي و يوقل عن الجنس او الحواية او اللدة فساد
و اش الحواية فساد اولد الكلبة
قرا فرويد مخلط مع القانون الجنائي المغربي هدا المكلخ
و ثانيا ثانيا اش جاب الهدرة للصلاة زعما باغي تقول لي راه عندي فراغ روحي الى ماكان نصلي
وراه الفراغ المادي للي مقود
الفراغ ديال الجيب اللي عندو فلوس مايلقاش مشكيل فالجانب الروحي وعلاش اخترعو المشروبات الروحية ؟ حيت هي كاتعمر الجانب الروحي و زايدون المغاربة عندهم السيرشارج فالروحيات
المهم المخزني نزل على دين مي بالعصا تاطلقت رجلو و خليت البروتكال ديالو فالتيقار
و في الكوميسارية شدوني مع شي معطلين واحد الضابط شاف لاكارط ديالي و هو يسول اش كايجيك فلان الفلاني
اه هداك والو غير تشابه فالاسماء
هز التيليفون تكلم شوية بهاديك الهضرة ديالهوم و طلقوني مع شي الواحدة د الليل عطاوني باكية ماركيز
قال لي الضابط انت باك يقدر يخدم البلاد كلها ف الفيرمات ديالو و جاي مصدعنا هنا اودي اودي كاليك معطل
انا راه يتيم ما عنديش با
سير سير داوي راسك
عاواتاني واحد اخور كاليك داوي راسك
و لكن انا ما مشيت ليهم بقيت جالس تما حدا البوليسي العساس بالكلاطة الرشاشة ديالو شاد مسكين اداعة طنجة فهداك البويت ديالو تما و ديك الساعة مازال كاين البرنامج ديال شكري يتحدث يرحمو مسكين
شربت معاه القهوة و قسمت معاه الكارو و بقينا كانهضرو و مرة مرة كاتدخل شي صطافيط عامرة بالقحاب كياغنيو و ناشطات فلت للبوليسي
الله ما نمشي تا يطلقو صحابي كلهوم
و لكن كيفاش انت زعما ولد هداك فلان الفلاني
اودي انا غير هاز سميتو صافي
ما عندي علاقة بيه
فهمتك اولدي
شوف من صغري ما شديت عندو ريال و ما يهمنيش يمشي يتقود الصحراوي اللي ولد دين بوه خدمت فالقهاوي و غير يعرفوني شكون كايخافو و يجريوا علي و يقولو لي عفاك الا ما عطينا التيساع البركاكة موجودين يوصلوها ليه راه ولدك بلونجور فالقهوة الفلانية هو اش كايدير كايصيفط ليهم و كايطردوني و تاراه بعت الديطاي فراس الدرب و جاني المقدم كيابوس يدي و يزاوكني نمشي بحالي حيت خايف
فهمتك اولدي
وا لشاف كون كنتي تفهم ما تدخل كاع لهاد الخدمة
كنت كاعي و بقا مسكين كيشوف فيا و سكت
طلقو صحابي مع الربعة د الصباح

This page is powered by Blogger. Isn't yours?